​🦁 မနုဿီဟ ဆိုတာ သတ္တဝါတစ်မျိုးလား 🦁

🔅မနုဿီဟ ဆိုတဲ့ အခေါ်အဝေါ်ဟာ ပါဠိဘာသာစကားကနေ ဆင်းသက်လာတာဖြစ်ပါတယ်။ လူတစ်ပိုင်း ခြင်္သေ့တစ်ပိုင်း ဖြစ်နေတာမို့လို့ မနုဿ - လူသား၊ သီဟ - ခြင်္သေ့ ဆိုတဲ့ အဓိပ္ပါယ်ကို ယူထားတာပဲ ဖြစ်ပါတယ်။

🔅မနုဿီဟကို တချို့ဘုရားစေတီတွေရဲ့ ထောင့်အချို့မှာ တွေ့မြင်နိုင်ပါတယ်။ မကောင်းဆိုးဝါးတွေ ဘီလူးတွေရဲ့ ရန်ကနေ ကာကွယ်စောင့်ရှောက်ဖို့အတွက် ထားရှိတာလို့ ယုံကြည်ကြပါတယ်။

🔅မနုဿီဟရုပ်တုတွေကို ဘယ်နှခုနှစ်ကစပြီး ထုလုပ်ခဲ့တယ်လို့ သေချာမသိရပေမဲ့ ဒီရုပ်တုတွေ ခေတ်စားခဲ့တာကတော့ ကုန်းဘောင်ခေတ် အမရပူရကနေလို့ ဆိုနိုင်ပါတယ်။ စာပေတွေမှာတော့ ကလျာဏီကျောက်စာမှာ စတွေ့ခဲ့တယ်လို့ ထင်ရပါတယ်။

🔅သာသနာလင်္ကာရစာတမ်းအရတော့ မနုဿီဟလို့ စတင်သိလာကြတာဟာ သထုံပြည်မှာ ဘီလူးဘေးကို ဟန့်တားတာကနေ စတင်ခဲ့တယ်လို့ တွေ့ရပါတယ်။ ပါရာဇိကဏ်အဋ္ဌာကထာမှာ သုဝဏ္ဏဘူမိလို့ သုံးနှုန်းထားတာကြောင့် မနုဿီဟဟာ သုဝဏ္ဏဘူမိသမိုင်းကြောင်းနဲ့ ဆက်စပ်နေမယ်လို့လဲ ယူဆကြပါတယ်။ 

🔅ဒီမှတ်တမ်းတွေအရတော့ မနုဿီဟဆိုတာ သတ္တဝါတစ်ကောင်မဟုတ်ဘဲ ဘီလူးတွေကို ခြောက်လှန့်ဖို့နဲ့ ရန်တွေကနေ ကာကွယ်စောင့်ရှောက်ဖို့ ဖန်ဆင်းထားတဲ့ ပုံရိပ်တွေပဲ ဖြစ်ပါတယ်။ ဒါကြောင့်မို့ မနုဿီဟဆိုတာ တကယ်ရှိခဲ့တဲ့သတ္တဝါတစ်မျိုးတော့ မဟုတ်ပါဘူး။ 

🔅မြန်မာစကားမှာ မနုဿီဟဖင်နှစ်ခွ ဆိုတဲ့စကား ရှိပါတယ်။ ဗိသုကာပညာရှင်တွေကတော့ ဒီလို ဖင်နှစ်ခွပုံစံမျိုး ထုဆစ်ထားတာဟာ အဆောက်အအုံကို ပိုပြီးခိုင်ခံ့အောင် ထောင့်နေရာတွေမှာ လိုက်လျောညီထွေထည့်ထားတဲ့ ဒီဇိုင်းသဘောအရဖြစ်မယ်လို့ သုံးသပ်ကြပါတယ်။

🔅ဒီလိုမျိုး လူတစ်ပိုင်း တိရစ္ဆာန်တစ်ပိုင်း ဖြစ်နေတဲ့ ဒဏ္ဍာရီလာ သတ္တဝါတွေကတော့ အများကြီးရှိပါတယ်။ မနုဿီဟလိုမျိုး ခြင်္သေ့နဲ့လူ ရောယှက်ထားတဲ့ သတ္တဝါမျိုးတွေ တခြားနိုင်ငံရဲ့ ဒဏ္ဍာရီတွေထဲမှာလဲ တွေ့နိုင်ပါတယ်။

🔅အထင်ရှားဆုံးကတော့ အီဂျစ်က Sphinx ကျောက်ရုပ်တွေ ဖြစ်ပါတယ်။ Sphinx ရုပ်တုတွေနဲ့ ပတ်သက်ပြီး အီဂျစ်တွေဆီမှာ ဘာလို့ အဲဒီလိုပုံစံ တည်ဆောက်ခဲ့လဲဆိုတဲ့ သမိုင်းအထောက်အထားတွေတော့ မရှိပါဘူး။

🔅လေ့လာသူတွေကတော့ Sphinx တွေဟာ အီဂျစ်တွေရဲ့ အထွတ်အမြတ်ထားတဲ့ နတ်ဘုရားတစ်မျိုးမျိုးကို ကိုယ်စားပြုပြီး တည်ဆောက်ထားတာဖြစ်တယ်လို့ ယူဆကြပါတယ်။ သူတို့ရဲ့ ဒဏ္ဍာရီမှာ သေမင်းလိုမျိုး တမလွန်ဘဝကို စောင့်တဲ့ ခြင်္သေ့ပုံစံနတ်ဘုရားရှိပါတယ်။ 

🔅အဲဒီနတ်ဘုရားရဲ့ အစောင့်အရှောက်ကို ယူတဲ့သဘောမျိုးနဲ့ ပိရမစ်တွေမှာ တည်ဆောက်ခဲ့တာဖြစ်မယ်လို့ ယူဆကြပါတယ်။ ဒါဟာလဲ ဒဏ္ဍာရီတစ်ခုပဲဖြစ်ပြီး တကယ်ရှိခဲ့တဲ့ သတ္တဝါလို့ ယူဆလို့မရပါဘူး။

🔅အီဂျစ်တွေလိုပဲ ဂရိတွေမှာလဲ လူတစ်ပိုင်း ခြင်္သေ့တစ်ပိုင်း Sphinx ဒဏ္ဍာရီရှိနေပါသေးတယ်။ အီဂျစ်တွေနဲ့မတူတာက အီဂျစ် Sphinx ဟာ နတ်ဘုရားကို ကိုယ်စားပြုပြီး ဂရိ Sphinx ကတော့ မကောင်းဆိုးဝါးကို ကိုယ်စားပြုပါတယ်။ 

🔅တူညီတာတစ်ခုကတော့ ဂရိတွေရဲ့ Sphinx က လဲ အစောင့်အရှောက်ပါပဲ။ ကောင်းတဲ့အစောင့်အရှောက်တော့ မဟုတ်ပါဘူး။ နတ်ဘုရားမ Hera က Thebes ဆိုတဲ့ ရှေးဟောင်းမြို့တော်ကို စောင့်ကြပ်ဖို့ ကျိန်စာတိုက်ပြီး လွှတ်လိုက်တဲ့ မကောင်းဆိုးဝါး အစောင့်အကြပ်ပဲ ဖြစ်ပါတယ်။

🔅အီဂျစ်၊ ဂရိတို့လိုပါပဲ အဲဒီချိန်က နာမည်ကျော်ကြားခဲ့တဲ့ ပါရှန်းတွေမှာလဲ လူတစ်ပိုင်း ခြင်္သေ့တစ်ပိုင်း သတ္တဝါတွေရဲ့ ဒဏ္ဍာရီတွေ ရှိပါသေးတယ်။ ပါရှန်းတွေရဲ့ Shirzad နတ်ဘုရား၊ Manticore ဆိုတဲ့ သတ္တဝါတွေဟာ မနုဿီဟ၊ Sphinx တို့လို အသွင်သဏ္ဍာန်တွေပဲ ဖြစ်ပါတယ်။ 

🔅အာရှဘက်ကို ပြန်ကြည့်ရင်လဲ ထိုင်းတွေရဲ့ Apsonsi နဲ့ Thepnorasi တို့ဟာ မြန်မာတွေရဲ့ မနုဿီဟလို ဒဏ္ဍာရီလာ သတ္တဝါတွေပဲ ဖြစ်ပါတယ်။  ဟိန္ဒူဘာသာမှာတော့ Narasimha ဆိုတဲ့ ဘုရားအသွင်ဟာ ခြင်္သေ့ဦးခေါင်းနဲ့ လူကိုယ်ရှိတဲ့ လူတစ်ပိုင်း ခြင်္သေ့တစ်ပိုင်း ဘုရားဖြစ်ပါတယ်။

🔅ဒီလို ဒဏ္ဍာရီလာ လူတစ်ပိုင်း ခြင်္သေ့တစ်ပိုင်း သတ္တဝါတွေ ဒါမှမဟုတ် နတ်ဘုရားတွေ အကြောင်းကို ပြန်ကြည့်ကြည့်ရင် နီးစပ်ရာ နီးစပ်ရာ ဒေသတွေအလိုက် ယဉ်ကျေးမှုတွေ ကူးလူးခဲ့ရာကနေ ပေါ်ပေါက်လာပုံရပါတယ်။

🔅မနုဿီဟ တို့ Sphinx တို့ဆိုတာ ဒဏ္ဍာရီတွေထဲမှာရှိတဲ့ အရာတစ်ခုသာဖြစ်ပြီး သတ္တဝါတစ်ကောင်တော့ မဟုတ်ဘူးဆိုတာကတော့ ထင်ရှားပါတယ်။ သူတို့အကုန်လုံးနီးပါးမှာ တူညီနေတဲ့အချက်တစ်ခုကတော့ သူတို့ဆီမှာ တစ်စုံတစ်ရာကို စောင့်ရှောက်ဖို့၊ စောင့်ကြပ်ဖို့ ရည်ရွယ်ချက်နဲ့ ဇာတ်လမ်းတွေ ရှိနေတယ်ဆိုတာပဲ ဖြစ်ပါတော့တယ်။